Ծաղկազարդի տոնը առաջնորդանիստ Սուրբ Սարգիս եկեղեցում
Ապրիլի 13-ին Հայաստանյայց Առաքելական Սուրբ Եկեղեցին տոնախմբեց Ծաղկազարդը՝ մեր Տեր Հիսուս Քրիստոսի հրաշափառ մուտքը Երուսաղեմ։ Տոնը Ն.Ս.Օ.Տ.Տ. Գարեգին Երկրորդ Ծայրագույն Պատրիարք և Ամենայն Հայոց Կաթողիկոսի օրհնությամբ հռչակվել է մանուկների օրհնության օր։
Ծաղկազարդից սկսվում է Տիրոջ երկրային կյանքի վերջին՝ Ավագ շաբաթը, որի բոլոր օրերն ունեն իրենց խորհուրդները։
Բերկրառատ տոնի առթիվ բոլոր եկեղեցիներում մատուցվեց Սուրբ և Անմահ Պատարագ: Արարատյան Հայրապետական թեմի առաջնորդանիստ Սուրբ Սարգիս եկեղեցում Սուրբ Պատարագը մատուցվեց առաջնորդական փոխանորդ Գերաշնորհ Տ. Նավասարդ արքեպիսկոպոս Կճոյանի հանդիսապետությամբ: Պատարագիչը Տ. Անուշավան քահանա Կոշեցյանն էր:
Հավարտ Սուրբ Պատարագի, Նավասարդ Սրբազանի ձեռամբ օրհնվեցին եկեղեցում ներկա մանուկները:
Արարողության ավարտին Սրբազան հայրն անդրադարձավ օրվա խորհրդին՝ մաղթելով Աստծո օրհնությունը բոլոր մանուկներին, որպեսզի լինեն լույսի որդիներ և իրենց ողջ կյանքի ընթացքում օրհնեն Տիրոջն ու արժանանան Հարության լուսավոր ավետիսին։
Ծաղկազարդի երեկոյան կատարվեց Դռնբացեքի կարգ: Դռնբացեքի արարողությանը ներա հավատացյալները հոգևորականի շուրթերով խնդրում են Աստծուն բացել Երկնքի արքայության և աստվածային ողորմության դռները։
Արարատյան Հայրապետական թեմի տեղեկատվական բաժին
- 2025-04-13