Սիրո հայկական տոնը լավ առիթ է՝ ասելու՝ «ես քեզ սիրում եմ»՝ օգտագործելով մեր սիրելի գրքերի սիրելի տողերը. չէ՞ որ սերը թաքնված է ոչ միայն մեր հայացքներում, այլև մեր սիրելի գրքերի էջերում:

«Իմ գաղտնի գրքաՍԵՐ» գրքառատ ու սիրառատ նախաձեռնությունն առաջարկում է սեր ու ուշադրություն փոխանցել գիրք նվիրելով։ Ծրագիրն իրականացնում են «Բուկինիստ» գրախանութների ցանցը և Արարատյան Հայրապետական թեմը: 2025 թվականի փետրվարի 15-ին՝ Սուրբ Սարգսի տոնին, նախաձեռնությունը կիրականացվի 9-րդ անգամ: 

Եթե ցանկանում ես դառնալ նախաձեռնության մասնակից, անհրաժեշտ է փետրվարի 1-ից 13-ը մոտենալ «Բուկինիստ» գրախանութների ցանկացած մասնաճյուղ, ընտրել գիրքը և թողնել սիրելիի հեռախոսահամարը: Տոնի նախընթաց օրերին կզանգահարեն և կհրավիրեն՝ գրքով արված սիրո խոստովանությունը ստանալու: Ծրագրի մասնակիցներին սպասվում է 20% զեղչ և այլ նվերներ գործընկերների կողմից:

Գրքերը կգտնեն իրենց հասցեատերերին, իսկ փոխանցողները կլինեն անանուն: 
 

Տարիներ շարունակ Սուրբ Սարգսի տոնին մեկ վայրում են հավաքվել գիրք-խոստովանություն ստացողները: Տեղում մասնակցել են խաղարկությունների, ստացել նվերներ կազմակերպիչների ու ծրագրի գործընկերների կողմից և օրը վերածել գրքասերների տոնի։ 
 

Արարատյան Հայրապետական թեմի տեղեկատվական բաժին