Ջրօրհնեքի կարգ՝ բուժկենտրոնի մատուռում
Հունվարի 14-ին ջրօրհնեքի կարգ է կատարվել Նոր Նորքի Սուրբ Գրիգոր Լուսավորիչ բժշկական կենտրոնի Սուրբ Աստվածածին մատուռում: Կարգը կատարել է Նոր Նորքի Սուրբ Աստվածածին եկեղեցու հոգևոր հովիվ Տեր Աշոտ քահանա Սաֆարյանը:
Հոգևորականի խոսքով՝ ամեն տարի մատուռում կատարվում է ջրօրհնեքի կարգ, հիվանդներին և բուժաշխատողներին փոխանցվում է Սուրբ Ծննդյան ավետիսը:
«Բուժում է բժիշկը, բժշկում Աստված: Մենք՝ որպես հոգևորական, չմերժելով բժիշկների միջնորդավորված միջամտությունը, հիվանդների կյանքում անչափ կարևորում ենք նաև Աստծո ուղղակի միջամտությունը: Աստծո պահպանիչ զորությունը խառնվում է ջրին:
Բազմաթիվ են վկայությունները, որ դրանից խմող հիվանդները բժշկվել են իրենց ախտերից»,- նշեց Տեր Աշոտը:
Օրհնած ջուրը բաժանվել է բուժաշխատողներին և հիվանդներին։ Արարողությանը մասնակցել են կենտրոնի բուժաշխատողները: Ամեն տարի մատուռի խաչքավոր է ընտրվում բժիշկներից մեկը: 2025 թվականին ընտրվել է բժիշկ Արգիշտի Արոյանը:
Հոգևորականն այցելել է կենտրոնի հիվանդներին: Բուժում ստացող անձինք ստացել են Սուրբ Հաղորդություն:
Արարատյան Հայրապետական թեմի տեղեկատվական բաժին
- 2024-01-15