Սուրբ Պատարագ՝ խնամքի կենտրոնի բնակիչների համար
«Հաղթանակ» շուրջօրյա խնամքի կենտրոնի բնակիչները մասնակցեցին Սուրբ Պատարագի: Այն մատուցվեց կենտրոնի տարածքում գտնվող Սուրբ Խաչ մատուռում, որը 2023 թվականի հոկտեմբերի 23-ին օծվել է Արարատյան Հայրապետական թեմի առաջնորդական փոխանորդ Գերաշնորհ Տեր Նավասարդ արքեպիսկոպոս Կճոյանի ձեռամբ:
Պատարագի ավարտին կենտրոնի հոգևոր պատասխանատու Տեր Արարատ քահանա Օրդոյանը կատարեց Ջրօրհնեքի կարգ՝ նորօրհնյալ Մյուռոնով և մատուռին նվիրեց խաչվառ:
Հոգևորականի խոսքով՝ պարբերաբար այցելում են կենտրոն, զրուցում բնակիչների հետ:
«Իմ նպատակն այն է, որ խնամքի կենտրոնում բնակություն հաստատած մարդիկ ամրապնդեն իրենց կապը մեր Եկեղեցու, հավատացյալների հետ: Փորձում եմ անել ամեն բան, որ իրենց չզգան մեկուսացված, անտեսված, չհայտնվեն հոգեբանական ծանր վիճակում, երբեք չհուսահատվեն, այլ իրենց կյանքը լցնեն աղոթքով»,- իր խոսքում նշեց Տեր Արարատը:
Քահանան հավելեց, որ ժամանակ առ ժամանակ տեղի մատուռում մատուցվում է Սուրբ Պատարագ: Կենտրոնի բնակիչներից ոմանք նաև ցանկություն են հայտնել և տեղում մկրտվել: Բնակիչներից մի քանիսը նաև մասնակցում են Սուրբ Պատարագի ԱՀԹ Սուրբ Երրորդություն եկեղեցում:
Արարատյան Հայրապետական թեմի տեղեկատվական բաժին
- 2024-10-15