Օրհնության կարգ՝ վերակառուցված մոմավառության սրահում
Վերակառուցվել է Ավանի Սուրբ Աստվածածին եկեղեցու մոմավառության սրահը:
Հոկտեմբերի 13-ին եկեղեցու հոգևոր հովիվ Տեր Հարություն քահանա Ավագյանը, հավարտ Սուրբ Պատարագի, նորօրհնյալ Մյուռոնով Ջրօրհնեքի արարողությունից հետո, կատարեց օրհնության կարգ մոմավառության սրահում։
Սրահը վերակառուցվել է անհատ բարերար Սուրեն Օքմինյանի աջակցությամբ:
Տեր Հարությունն իր օրհնության խոսքն ուղղեց նախաձեռնության բոլոր աջակիցներին:
«Մեր կյանքն ունի մեկ գերագույն նպատակ՝ գոհացնել Աստծուն: Աստծուն հաճելի գործեր կատարենք, սրբացնե՛նք մեր կյանքը և մեր սրտերը: Չկա ավելի հզոր բան, քան մաքուր սիրտը: Առանց սիրո ապրելն անիմաստ է»,- իր խոսքում նշեց Տեր Հարությունը և բարերարին նվիրեց Տիրամոր սրբապատկերը։
Ներկաները մասնակցեցին Ավան վարչական շրջանի և համայնքի մշակույթի տան կողմից կազմակերպված միջոցառմանը։ Կատարումներով հանդես եկան «Հայֆոլկ երգիչներ» համույթի սաները։
Արարատյան Հայրապետական թեմի տեղեկատվական բաժին
- 2024-10-14