«Մի՛ վախեցիր, Մարիա՛մ, որովհետև Աստծուց շնորհ գտար». Աստվածաշնչյան այս տողերը Գաբրիել հրեշտակապետի ավետիսն են: Ավետարանական այս դրվագում է ներկայացվում Ավետման պատմությունը, երբ Մարիամն իմանում է, որ զավակ է ունենալու: 

Հրեշտակը սպասում է Կույսի պատասխանին, ու Ավետման տոնի խորհրդից սկսվում է մեր փրկության պատմությունը:

Հավատք, խոնարհություն, սեր, պատրաստակամություն

Սուրբ Մարիամ Աստվածածնի Ավետման օրը անշարժ տոն է: Ապրիլի 7-ին եկեղեցիներում մատուցվում է Սուրբ Պատարագ, կատարվում է մայրության բերկրանքին սպասող կանանց օրհնության կարգ: Ամենայն Հայոց Գարեգին Երկրորդ կաթողիկոսը ապրիլի 7-ը հռչակել է մայրերի և մայրության բերկրանքին սպասող կանանց օրհնության օր:

Ավետման գեղեցիկ դրվագը ներկայացնում է Ղուկաս ավետարանիչը: Պատահական չէ, որ Աստծո որդուն լույս աշխարհ բերեց Մարիամը, ընդգծում է Ներքին Չարբախի Սուրբ Խաչ եկեղեցու հոգևոր հովիվ Տեր Հրաչյա քահանա Գյոզալյանը: Սուրբ Կույսը հանդես է գալիս՝ որպես անմնացորդ սիրող, հոգատար ու նվիրված մայր, թեև նրա մասին դրվագները շատ չեն Ավետարանում: 

«Աստծո կողմից ընտրվեց Մարիամը, որովհետև հավատքի ծնունդ էր ու խոնարհության օրինակ: Աստվածամայրը ծնվեց հավատացյալ ընտանիքում, սնվեց հավատքով, դաստիարակվեց որպես Աստծո խոնարհ զավակ ու լույս աշխարհ բերեց մեր փրկչին՝ Տեր Հիսուս Քրիստոսին»,- նշում է Տեր Հրաչյան:

Եկեղեցական ավանդության համաձայն՝ Մարիամը մինչև 14 տարեկան  ծառայել է Տաճարում ու վերադառնալով հայրական տուն՝ Նազարեթ, նշանվել է Հովսեփի հետ:

Ըստ Ղուկաս ավետարանչի՝ Գաբրիել հրեշտակապետը գալիս է Մարիամի մոտ ու ասում. «Եվ ահա կհղիանաս ու կծնես մի որդի և անունն էլ Հիսուս կդնես։ Նա մեծ կլինի և Բարձրյալի որդի կկոչվի։ Եվ Տերը՝ Աստված, նրան կտա նրա հոր՝ Դավթի աթոռը» (Ղուկաս 1: 31-32):

Մարիամի պատասխանը չի ուշանում. «Ահավասիկ Տիրոջ աղախինն եմ, թող քո խոսքի համաձայն լինի ինձ» (Ղուկաս 1:38):

Կույսի խոսքերն արտահայտում են իր անսահման հավատը, վստահությունն Տիրոջ հանդեպ, նա գիտակցեց իր առաքելությունը, բացատրում է քահանան.

«Մարիամ Աստվածածինը կատարյալ կնոջ խորհրդանիշ է: Իր միջոցով մենք ստացանք փրկության ճանապարհը: Աստվածամայրը խորհրդանշում է հավատք, խոնարհություն, սեր, պատրաստակամություն ունեցող կնոջ կերպար: Խոնարհությունը նրան բարձրացրեց երկինք»:

Հոգևորականի պատգամն է, որ այսօր յուրաքանչյուր կին օրինակ ունենա Աստվածամորը:

Կինը՝ աստվածային արարչագործության շարունակականության մասնակից 

Սուրբ Կույսի միջոցով աշխարհ եկավ Փրկությունը, Լույսը, Կյանքը, ընդգծում է Տեր Հրաչյան:  

Ստացվում է՝ կնոջ դերը չնվազեցվեց, հակառակը՝ Տերը ցանկացավ, որ Աստծո որդին աշխարհ գա Աստվածամոր միջոցով, ընդգծվեց կնոջ, մոր դերի նշանակությունը:

«Տերը յուրաքանչյուրին տվեց իր առաքելությունը՝ տղամարդուն ասաց՝ քո քրիտինքով պիտի հաց վաստակես ու ընտանիքդ պահես: Կնոջն ասաց՝ ցավերով պիտի որդի ծնես: Մարդածնության շնորհը տրվեց կնոջը: Գարեգին Ա. Ամենայն Հայոց Կաթողիկոսը մի գեղեցիկ համեմատություն ունի: Ասում է՝ տունը, ընտանիքը փոքրիկ եկեղեցի է, այնտեղ քահանան մայրն է, հավատացյալները՝ ընտանիքի անդամները, զավակները»,- նշում է Տեր Հրաչյան: 

Հոգևորականը, խոսելով կնոջ կերպարի մասին, ևս մեկ անգամ հիշեցնում է նրանց դերի ու առաքելության կարևորությունը: Կանայք պետք է պատասխանատվությամբ վերաբերվեն իրենց տրված առաքելությանը, չէ՞ որ մարդկային նոր կյանքին ծնունդ տալով՝ կինը մասնակից է դառնում աստվածային արարչագործության շարունակականությանը:

Անի Ավագյան