Նավասարդ Սրբազանն ընդունեց թեմի Սուրբ Խաչ եկեղեցու երգչախմբի անդամներին
Ապրիլի 18-ին Արարատյան Հայրապետական թեմի առաջնորդական փոխանորդ Գերաշնորհ Տեր Նավասարդ արքեպիսկոպոս Կճոյանն ընդունեց թեմի Արաբկիրի Սուրբ Խաչ եկեղեցու արական երգչախմբի անդամներին՝ եկեղեցու հոգեւոր հովիվ Տ․ Պարթեւ քահանա Մուրադյանի ու երգչախմբի գեղ․ ղեկավար Շահե Քեշիշյանի գլխավորությամբ։ Երգիչները եկել էին ճամփորդությունից առաջ Սրբազան հոր օրհնությունը ստանալու։
Ֆրանսիայի Վերսալի օպերայի տնօրինության կողմից Արարատյան Հայրապետական թեմի Արաբկիր Ս․ Խաչ եկեղեցու արական երգչախումբը ստացել է հրավեր՝ մասնակցելու ապրիլի 24-ին Փարիզի Վերսալի տաճարում տեղի ունենալիք համերգին, որը նվիրված է հայոց ցեղասպանության տարելիցին։
Սրբազան հայրն իր ուրախությունը հայտնեց՝ նշելով, որ թեմական երգչախմբի համար այս հրավերը մեծ հնարավորություն ու միաժամանակ նաեւ մեծ պատասխանատվություն է, քանի որ ներկայացնելու են հայ հոգեւոր երգերն ու երգչախմբային արվեստը Վերսալի աշխարահռչակ օպերայի կազմակերպված համերգին։ Նավասարդ Սրբազանը ստեղծագործական նորանոր հաջողություններ մաղթեց երգչախմբին:
Շահե Քեշիշյանը երգչախումբը ձեւավորել է Արակբիրի Ս․ Խաչ եկեղեցու հովանու ներքո, դեռևս 5 տարի առաջ, եւ տակավին երիտասարդ, սակայն երգչախումբն իր պրոֆեսիոնալությամբ արդեն լուրջ հայտ է ներկայացնում։
Արարատյան Հայրապետական թեմի տեղեկատվական բաժին
- 2023-04-19