Տոնական մեծ միջոցառում՝ Արաբկիր համայնքում
Հունվարի 7-ին, Արարատյան Հայրապետական թեմի առաջնորդական փոխանորդ Գերաշնորհ Տեր Նավասարդ արքեպիսկոպոս Կճոյանի օրհնությամբ, Արաբկիրի Սուրբ Խաչ եկեղեցուն կից գտնվող դահլիճում տեղի ունեցավ տոնական մեծ միջոցառում՝ նվիրված Սուրբ Ծննդյանը և Ամանորին։
Միջոցառմանը ներկա էին Արաբկիրի Սուրբ Խաչ եկեղեցու հոգևոր դասը՝ հոգևոր հովիվ Տեր Պարթև քահանա Մուրադյանի գլխավորությամբ, ինչպես նաև Արաբկիր համայնքի անապահով ընտանիքների երեխաները և 44-օրյա պատերազմի ընթացքում իրենց զավակներին կորցրած ընտանիքների երեխաները։ Միջոցառման սկզբում ներկաներին Ամանորի և Սուրբ Ծննդյան մաղթանքներ փոխանցեց Տեր Տիգրան քահանա Բադիրյանը։
Միջոցառման ընթացքում իրենց կատարումներով հանդես եկան «Մասունք» ազգագրական երգի-պարի համույթը, Արաբկիրի Հայորդաց տան «Կանթեղ» երգչախումբը, Եկեղեցուն կից գործող Կիրակնօրյա դպրոցի սաները։
«Մասունք» ազգագրական երգի-պարի համույթը մի շարք ազգային երգեր կատարելուց հետո ցուցադրեց նաև ազգային խաղեր։ Խմբի անդամները երեխաներին էլ ներառեցին ազգային պարեր կատարելիս, և նրանց հետ Յարխուշտա պարեցին։
Լեփ-լեցուն դահլիճում տիրող մթնոլորտը ներկաներին նույնպես ստիպեց միանալ ազգային խաղերին։ Ապա հավաքվածները ազգային պարեր սովորեցին՝ «Մասունք»-ի հետ, և շուրջպար պարեցին։
Միջոցառման ավարտին ներկաներին այցելեցին Ձմեռ պապն ու Ձյունանուշը, ովքեր երեխաների համար պատրաստել էին ամանորյա նվերներ՝ քաղցրավենիքի տեսքով։
Արարատյան Հայրապետական թեմի տեղեկատվական բաժին
- 2022-01-07