Գուրգեն Մարգարյանի անվան թիվ 94 ավագ դպրոցում այսօր գրաբարի բաց դաս էր կազմակերպվել: Ուսուցչուհի Վարդուհի Մարգարյանի հրավերով գրաբարյան բաց դասին մասնակցում էր ԱՀԹ Մալաթիայի Ս. Աստվածածին եկեղեցու հոգևոր հովիվ Տ. Տիրան քահանա Առուշանյանը: Դասը տեր հայրը Տերունական աղոթքով սկսեց, ապա աշակերտներին ու ուսուցիչներին փոխանցեց Տ. Նավասարդ Սրբազան հոր ողջույնն ու օրհնությունը: Տեր Տիրանը խոսեց գրաբարի կարևորության և այն սովորելու ընձեռված հնարավորության մասին.

«Նավասարդ սրբազան հոր օրհնությամբ ու աջակցությամբ Արարատյան Հայրապետական թեմը մեկնարկել է «Գրաբարյան օրեր» ծրագիրը, որը բոլորիդ համար հրաշալի առիթ է մեր մայր լեզվի հիմքերը սովորելու: Շատերն են օտար լեզուներով տարվում, տարբեր առարկաներ սովորելու համար մեծ ջանքեր գործադրում, բայց այդ ամենի հետ մեկտեղ յուրաքանչյուրս պարտավոր է մեր մայրենի լեզուն լավ իմանալ: Գրաբարը մեզ ավելի ուժեղ ու խելացի է դարձնում: Գրաբարն է մեր հոգու լեզուն, որով խոսում, աղոթում ու հաղորդակցվում ենք մեր Արարչի, մեր Աստծո հետ»:
Աշակերտներն իրար հերթ չտալով՝ գրաբարի կանոններն ասացին, հատվածներ արտասանեցին Ս. Մովսես Խորենացու «Հայոց պատմությունից» և Ս. Գրիգոր Նարեկացու «Մատյան ողբերգությունից»:
Ավարտին տեր հայրը պահպանիչ աղոթք կարդաց, ապա աշակերտներին հարցում արեց, թե ինչն էր անհասկանալի: Աշակերտները զարմանքով նշեցին, որ ամեն ինչ հասկանալի էր:
Բաց դասին մասնակցում էին դպրոցի ուսուցիչները, ովքեր նույնպես ոգևորվել էին ծրագրի մեկնարկից և առաջարկեցին մրցույթ կազմակերպել նաև ոչ բանասեր ուսուցիչների համար, քանի որ իրենք ևս որոշել են գրաբար սովորել:
«Գրաբարյան օրեր» ծրագիրը շարունակվում է: Այն այս տարի կամփոփվի մրցույթով, որի արդյունքում լավագուն աշակերտներն ու իրենց ուսուցիչները կպարգևատրվեն: