Տյառնընդառաջը՝ ԱՀԹ եկեղեցիներում
Փետրվարի 13-ին ԱՀԹ բոլոր եկեղեցիներում տեղի ունեցավ Երեկոյան ժամերգություն, կատարվեց Տյառնընդառաջի նախատոնակը և տարվա առաջին Անդաստանի արարողությունը, որի ընթացքում օրհնվեցին աշխարհի չորս կողմերը: Թեմի եկեղեցիների բակերում վառվեց ավանդական խարույկը։
ՀԱԹ Սուրբ Երրորդություն եկեղեցու բակում հավաքվել էին մեծ թվով նորապսակներ՝ մասնակից դառնալով տոնական միջոցառմանը։ Արդեն ավանդույթ է, որ Սուրբ Երրորդություն եկեղեցու երիտասարդաց միության անդամները պատրաստում են համեղ պարկեր` լցված աղանձով, զանազան կոնֆետներով և տոնին բնորոշող հացահատիկով։ Արարողությունից հետո երիտասարդները տոնական պարկերը բաժանում են նորապսակ զույգերին և երեխաներին։
Նոր Նորք վարչական շրջանի Սուրբ Սարգիս և Սուրբ Աստվածածին եկեղեցիներում Տյառնընդառաջը նշվեց մեծ հանդիսությամբ։ Երկու եկեղեցիների բակերում էլ կազմակերպվեցին տոնական միջոցառումներ։ Սուրբ Աստվածածին եկեղեցու բակում վարչական շրջանի նախաձեռնությամբ կազմակերպվել էր նաև թեմատիկ միջոցառում հրավիրված ազգագրական համույթների մասնակցությամբ, որոնք ազգային երգ ու պարով լրացրել են օրվա տոնական խորհուրդը։
Արաբկիրի նորաօծ Սուրբ Խաչ եկեղեցում Նորապսակների օրհնության կարգից հետո ներկաներին բաժանվեցին տոնական գաթաներ, ապա տեղի ունեցավ հուրասիրություն, որը կազմակերպել էին համայնքապետարանը և Հայաստանի Ազգային Սկաուտական Շարժումը։ Եկեղեցում պսակադրված նորապսակ զույգերին տրվեցին խորհրդանշական նվերներ։
Նորագավիթի Սուրբ Գևորգ եկեղեցու բակում «Մասունք» ազգագրական երգի-պարի համույթը հանդես եկավ տոնական համերգով:
ԱՀԹ Մալաթիայի Սուրբ Աստվածածին եկեղեցու կողմից ձևավորված գեղեցիկ և ուսանելի ավանդույթ է տերունական այս տոնը նշել հայորդաց տան սաների հետ։ Եկեղեցի հրավիրված Մալաթիայի Հայորդաց տան սաներն աղոթակից եղան Ժամերգությանը և Նախատոնակին։ Երեխաներն իրենց տոնական կատարումներով էլ ավելի ջերմացրին վառվող տոնական խարույկը։
Ներքին Չարբախի Սուրբ Խաչ եկեղեցում տեղի ունեցավ տոնական միջոցառում, վառվեց տոնական խարույկ: Ազգագրական երգի-պարի խմբի ուղեկցությամբ հավատացյալները շուրջպար բռնեցին:
Ավանի Սուրբ Աստվածածին եկեղեցում ազգագրական երգ ու պարի ուղեկցությամբ տոնեցին Տյառնընդառաջը:
Արարատյան Հայրապետական թեմի տեղեկատվական բաժին
- 2022-02-14