«Եկեղեցին առանց երեխաների չի կարող գործել». Նուբարաշենում բացվեց Կիրակնօրյա դպրոց
Արարատյան Հայրապետական թեմում, թեմի առաջնորդական փոխանորդ Գերաշնորհ Տեր Նավասարդ արքեպիսկոպոս Կճոյանի օրհնությամբ, 2021 թ․ ամռանը մեկնարկել էր Կիրակնօրյա դպրոցների ուսուցիչների վերապատրաստման դասընթաց: Դասընթացին մասնակցում էին Երևանի բոլոր համայնքներից ուսուցիչներ, ովքեր արդեն, անցնելով քննությունների փուլը, հավաստագրեր են ստացել և հնարավորություն՝ վարելու դասընթացներ Երևանի Կիրակնօրյա դպրոցներում: Ի դեպ, վերապատրաստման դասընթացի վերջնանպատակներից մեկն էլ հենց դա է՝ բոլոր համայնքներում ունենալ գործող Կիրակնօրյա դպրոցներ, նոր շունչ հաղորդել արդեն գործողներին:
Այժմ մեկնարկել են Կիրակնօրյա դպրոցների հիմնման աշխատանքները բոլոր այն համայնքներում, որոնցում նման դպրոցներ չէին գործում: Այսօր էլ Նուբարաշեն համայնքում տեղի ունեցավ Կիրակնօրյա դպրոցի առաջին դասը:
Նուբարաշենի Սրբոց Նահատակաց եկեղեցու հոգևոր հովիվ Տեր Բարդուղիմեոս քահանա Հակոբյանը մեր հետ զրույցում նշեց. «Կրակնօրյա դպրոցի բացումից առաջ հայտարարություն տարածեցինք, որ ցանկացողները կարող են գալ ու քրիստոնեկան կրթություն ստանալ: Ու սպասվածի նման, շատ երեխաներ եկան ու գրանցվեցին: Ես վստահ եմ, որ այս դասընթացին մասնակցող երեխաները ավելի կմոտենան եկեղեցուն, կծանոթանան եկեղեցական կյանքին ու հաղորդակից կլինեն այդ ամենին: Եկեղեցին առանց երեխաների չի կարող գործել, որովհետև յուրաքանչյուր եկեղեցի ունի կառույցներ, որոնք կնդանություն են հաղորդում եկեղեցուն»:
Մասնակիցները 28-ից ավելի երեխաներ էին՝ 9-14 տարեկան: Առաջին դասը սկսվեց Նուբարաշենի Սրբոց Նահատակաց եկեղեցու հոգևոր հովիվ Տեր Բարդուղիմեոս քահանա Հակոբյանի հետ՝ միասնական աղոթքով: Ապա Տեր հայրը բարի երթ ցանկացավ աշակերտներին և նրանց մաղթեց, որ հաստատուն լինեն հավատքի մեջ և դասերին էլ ակտիվություն ցուցաբերեն:
Ապա սկսվեց բուն դասը, որը վարում էր Նարինե Պետրոսյանը: Ոսւոցչուհին մեզ հետ զրույցում անկեղծանում է. «Ես շատ ոգևորվեցի, երբ իմացա, որ Արարատյան Հայրապետական թեմը իրականացնելու է Կիրակնօրյա դպրոցների ուսուցիչների վերապատրաստում: Այն լավ հնարավորություն էր, մոտիկից ծանոթանալու հոգևորականներին, լսելու նրանց խոսքն ու հետո այդ գիտելիքներով կիսվելու երեխաների հետ»:
- 2021-12-19