Վեհափա՛ռ Տեր,

Արարատյան Հայրապետական թեմի հավատավոր զավակների և հոգևորականաց դասի անունից շնորհավորում ենք Ձերդ Սրբությանը՝ 70-ամյա հոբելյանի առթիվ:

Աստվածային նախախնամությամբ տարիներ առաջ ստանձնեցիք Հայ ժողովրդի հոգևոր առաջնորդությունը` Հայաստանյայց Եկեղեցու պայծառության աստվածահաճո տեսլականով ու նվիրումով: Երկու տասնամյակից ավելի Ձերդ Սրբության նվիրական ջանքերով զորացրիք քրիստոնեական ճանաչողությունը հայ ազգի կյանքում, կարևորեցիք հասակ առնող մեր զավակների հոգևոր կրթությունը՝ սնելով և կրթելով մեր հայրերի հավատքով, քրիստոնեական արժեքներով ու հայրենական ավանդներով:

Վեհափա՛ռ Տեր,

Լիահույս ենք, որ Ձեր իմաստությամբ դեռ երկար տարիներ պիտի առաջնորդեք հավատացյալ հայ ժողովրդին: Վստահ ենք, որ Ձեր գահակալության հաջորդ տարիները ևս նշանավորվելու են եկեղեցաշինությամբ, հոգևոր կյանքի զորացմամբ, Եկեղեցի-Բանակ և Եկեղեցի-Սփյուռք կապի ամրապնդմամբ:

Աղոթական հոգով հայցում ենք առ Աստված, որ Տերն աստվածային ներկայությամբ և զորակցությամբ ուղեկից լինի Ձեզ: Երկար տարիների կյանք և բազմաբեղուն գահակալություն պարգևի Ձերդ սրբությանն՝ ի փառս Աստծո, ի պայծառություն Հայաստանյայց Առաքելական Սուրբ Եկեղեցու և ի բարօրություն Հայաստան աշխարհի:

Մատչիմ ի համբույր Ձերդ Սրբության Օծյալ և Սուրբ Աջույն՝

ՆԱՎԱՍԱՐԴ ԱՐՔԵՊԻՍԿՈՊՈՍ ԿՃՈՅԱՆ