Արաբկիրի Սուրբ Աստվածածին մատուռի ուխտի օրը նշանավորվեց նոր խաչքարերի նվիրաբերման արարողությամբ: Արարատյան Հայրապետական թեմի Արաբկիրի եկեղեցու հոգևոր հովիվ Տեր Բաբկեն քահանա Հայրապետյանի ձեռամբ կատարվեց խաչքարերի օրհնության կարգ: Քաղաքի բնակիչները խաչքարեր են նվիրաբերում մատուռին՝ ի նշան երախտագիտության: Խաչքարերից մեկը, սակայն, երախտիքի ու խոնարհման առանձնակի խորհուրդ ունի. Աջափնյակի բնակիչներն այն նվիրել են Ապրիլյան պատերազմում նահատակված հայորդիների հիշատակին: Միջոցառմանը ներկա էր նաև Արաբկիր վարչական շրջանի ղեկավարի աշխատակազմի քարտուղար Արմեն Բալբաբյանը, ով իր և Արաբկիր վարչական շրջանի ղեկավար Արամ Դանիելյանի անունից շնորհակալություն հայտնեց նախաձեռնության հեղինակներին:

Նվիրաբերվող խաչքարերն ու մատուցվող մատաղները վկայում են, որ երեք տարի առաջ կառուցված մատուռը հետզհետե դառնում է ուխտատեղի հավատավոր ժողովրդի համար։

Արարատյան Հայրապետական թեմի տեղեկատվական բաժին