Տ. Նավասարդ Սրբազանն օծեց Նոր Նորքի Ս. Սարգիս եկեղեցու զանգերն ու խաչքարը Սեպտեմբերի 13-ին Արարատյան Հայրապետական թեմի առաջնորդական փոխանորդ գերաշնորհ Տ.Նավասարդ արքեպիսկոպոսի ձեռամբ օծվեցին ԱՀԹ Նոր Նորքի Ս.Սարգիս եկեղեցու զանգերն ու խաչքարը: Զանգերը եկեղեցուն է նվիրաբերել Սամվել Շահնազարյանը, իսկ խաչքարը եկեղեցու բակում տեղադրվել է Արմեն Եսայանի բարերարությամբ: Նոր Նորքի Ս. Սարգիս եկեղեցին, որ օծվել է 2000թ, ցայսօր զանգեր չի ունեցել, և համայնքի կյանքում այս իրադարձությունը բացառիկ նշանակություն ունի: Տ. Նավասարդ Սրբազան հայրը, դիմելով եկեղեցու հավատացյալներին, մասնավորապես ասաց. «Ո՜վ Ողորմած Տեր, թող երբեք չլռեն զանգերը Հայոց եկեղեցու, թող նրանց ղողանջները մեր հոգիների կոչնակը դառնան: Եվ թող ղողանջն այս եկեղեցու, որպես անլռելի զանգակատուն, հնչի հանապազ ու, որպես Աստծո ձայն, այս բարձունքից տարածվի ամենուր: Ով ականջ ունի, թող լսի նորաօծ այս զանգերի «բոմբիւն»-ը, գա Աստծո տուն, հոգին բանա Նրա առաջ, և թող Տերը բնակվի նրա աղոթական հոգում: «ՏՈ՛ՒՐ ՏԷՐ ՇՆՈՐՀՍ ՁԱՅՆԻ ԱԶԴՄԱՆՍ ԱՅՍՈՐԻԿ, ԶԻ ԱՄԵՆԵՔԵԱՆ՝ ՈՐՔ ԼՈՒԻՑԵՆ ԶՀՆՉՈՒՄՆ ՍՈՐԱ, ԶՂՋԱՍՑԻՆ Ի ՍԻՐՏՍ ԻՒՐԵԱՆՑ, Ի ՎԵՐԱ ՉԱՐԵԱՑ ԳՈՐԾՈՑ. ԵԻ ԴԱՐՁՑԻՆ Ի ԽՈՐՀՐԴՈՑ ՉԱՐԵԱՑ…» («ՄԱՇՏՈՑ»): Սիրելինե՛ր, Օծյալ խաչը մեր Տիրոջ՝ Հիսուս Քրիստոսի գահն է: Խաչի վրա թափված Իր անմեղ Արյունը դարձավ գինը մարդկության փրկության: Մենք խաչապաշտ ենք, հավատում ենք խաչով հաղթությանը և երկրպագում ենք խաչին: Խաչը խորհրդանիշն է մեր քրիստոնեական հավատքի: Այն բարձրացնում ենք մեր գմբեթների վրա, դրոշմում քարին, խաչակնքում՝ որպես հավատքի, իսկության արտահայտություն: Խաչը մեր ժողովրդի կյանքում եղել է թե՛ որպես սուր և թե՛ վահան՝ ընդդեմ չարի: Հայ քրիստոնյան սպառազինված է խաչի հաղթական խորհրդով: Հավատքով պետք է նայել խաչին և խաչի կնիքը կրել մեր սրտերում: Այս նորաօծ խաչքարը խաչապաշտությանն ընծայված ուրույն մի արտահայտություն է, «փրկություն է աշխարհի չորս ծագերի համար, սրբություն է հոգու չորս առաքինությունների համար. վերինը՝ խոհեմության, ներքինը՝ արիության, աջը՝ արդարության, իսկ ձախը՝ ողջախոհության համար» (Սբ. Գ. Տաթևացի): «ԵԿԱՅՔ ԺՈՂՈՎՈՒՐԴՔ ԵՐԿՐՊԱԳԵՍՑՈՒՔ ԱՍՏՈՒԱԾԱՅԻՆ ՍՈՒՐԲ ՆՇԱՆԻՍ, ՀԱՄԲԱՐՁԷՔ ՄԻԱԲԱՆ ԶՁԵՌՍ ՁԵՐ Ի ՍՐԲՈՒԹԻՒՆ, ԵՒ ԶԲՆԱԿԵԱԼՆ Ի ՍՄԱ ՄԻՇՏ ՓԱՌԱՒՈՐԵՍՑՈՒՔ» (ՇԱՐԱԿԱՆ): Սիրելի բարերա՛ր զավակներ Սամվել Շահնազարյան և Արմեն Եսայան, Թող Տերն անսպառ ու մշտամնա պահի ձեր բարեսեր հոգին, առատապես օրհնի ձեր օջախները: Աղոթենք առ Բարձրյալն Աստված, որ այս նորաօծ զանգերի ղողանջներն ու խաչքարի մշտամնա ներկայությունը, որպես մեր վերընձյուղված հավատքի Հիշատակարան, ուղեցույց լինեն հավատավոր հոգիներին՝ դառնալով խթան և առաջմղիչ ուժ հոգևոր նորոգության: Ամեն»: Արարողության ավարտին համայնքը կազմակերպել էր տոնախմբություն: Համերգային ծրագրում ելույթ ունեցան Մայր Աթոռ Սուրբ Էջմիածնի և ՀԲԸՄ Նոր Նորքի Հայորդյաց տան դհոլահարները, «Հայկազունք» ազգագրական երգի պարի և «Նարեկ» պարային համախմբերը: Տոնն ամփոփվեց հրավառությամբ: